تدوينة طبيب مهمة من أجل أطفالكم ومستقبلهم

18:15 02 أغسطس 2016 الكاتب :   د.أحمد الخطيب

كلمة كتبها لي أهل طفلة كشفت عندي من سنة تقريباً على البيدچ.

بنتهم كانت حوالي ٤ سنوات، جايين يكشفوا كشف روتيني جداً عشان البنت سخنة.

المهم، البنت طلعت متأخرة عقلياً وحركياً لدرجة أنها لسه ماشية من كام شهر فاتوا بس!

استغربت جداً من عدم اكتراث الأهل أو اهتمامهم بالموضوع.

المهم قالوا: إن في دكتور صديق ليهم كان نازل من أمريكا وقالهم: إنها كويسة وده عادي وكده!

أنا الصراحة اتصدمت وقعدت أشرح لهم - بهدوء والله - الحالة وسبب التأخّر وكان تركيزي كله على الموضوع ده عشان ألحق ما تبقى من قدرات المخ.

قعدت معاهم ساعة إلا ربع تقريباً.

الأب خرج ولم يعُد.

لم تعُد سوى كلماته التي أرسلها إليَّ جزاءً على اللي المفروض واجب عليا واللي الناس بتسميه "الأمانة الطبية".

"لا يفقه شيئاً في الطب".

الأسبوع اللي فات..

أمّ كشفت عندي لبنتها - عمرها سنة تقريباً - بتشتكي من قصة طويلة من ساعة الولادة وأصابتها بالصفراء اللي استمرت لأربع أشهر وإزاي ماكانتش بتنام وازاي اتأخرت في صلب رأسها للشهر السابع و.. وفي وسط الكلام، قالتلي: إنها كشفت على بنتها زمان - من ٤ شهور- عند دكتور مشهور جداً وقال "كلام غريب عن ضعف المخ"، وكان عاوز يدخلها ف "قصة غريبة" وطلب تحاليل "غالية جداً" بس الحمد لله - والكلام ليها - كشفت عند دكتور تاني وقالها نقص كالسيوم وخلاص وكده وخدت كالسيوم.

المهم، كشفت عليها وبرضه طلعت متأخرة عقليا وحركياً واجتماعياً، وقلتلها إن كل الدكاترة اللي كشفوا عليها من ساعة الولادة كانوا غلط والدكتور "الغريب ده" هوا اللي صحّ.

الأم بكت والله بالدموع في العيادة وجالها شبه انهيار عصبي حرفياً بلا مبالغة والله!

الحمد لله طمنتها وعملنا اللازم وحولتها لاستشاري مخ وأعصاب وماشيين في العلاج ربنا يشفيها.

النبي صلى الله عليه وسلم في غزوة بدر، بعث سيدنا علي بن أبى طالب وبعض الصحابة عشان يتجسسوا على جيش قريش، وكان نفسهم يكون الأخبار اللي وصلتلهم غلط ويكون اللي موجود قافلة أبى سفيان اللي فيها أموالهم مش الجيش.

المهم قبضوا على "سقايين المياه" لقريش.

وكانوا كل ما يسألوهم مين اللي بتسقوهم، لو قالوا "الجيش" يضربوهم! ولو قالوا "أبو سفيان " يسيبوهم!

فلما النبي عرف قالّهم: "إن صدقوكم ضربتموهم وإن كذبوكم تركتموهم"!!

عاوز أقول: إننا - ودي طبيعة في البشر- بنخاف من كل حاجة.

بنخاف من التعب.

بنخاف من المجهول.

بنخاف من المرض.

فبنحاول نهرب منه بدل ما نواجهه، مع إن ده ممكن يكلفنا حياتنا، أو حياة من نحب.

لازم نعرف إن أكتر من ٩٠٪ من قدرات المخ بتنمو أول سنتين من العمر، وأي تأخير في العلاج بعد السنّ ده نتايجه Irreversible للأسف، وبالمثل، معظم حالات المخ والأعصاب بتجيب نتايج هايلة جداً لو اتشخصت صح، واتعالجت بدري.

لازم نفهم كمان إن مفيش أي مصلحة لدكتور إنه يتعب نفسه ويدخلك في متاهات ويحط نفسه ف موضع شك هوا في غنى عنه، ولو عاوز تتأكد، اكشف عند دكتور مخ وأعصاب متخصص يقولك الصحّ - مش اللي إنت عاوز تسمعه.

العلامات اللي هقولها دي مهمة #‏جداً والله لكل أم أو أبّ يلاحظها في طفله أول سنة من العمر.

ومش محتاجة دكتور ولا صعبة.

يا ريت كلنا نعمل لها Save ونطبقها على أطفالنا وننشرها عشان نلحق طفل قبل ما ييجي وقت الطفل يعيش طول عمره جسد بس:

- ‏لو عند شهرين ابنك لسه مش بيتابعك بعنيه أو بيتابع أي شيء بيتحرك، أو لو مش بينتبه للصوت العالي (قفل باب،  تلفزيون، زعيق) أو مبيضحكش للناس، أو مش بيدخل إيده في فمه.. اكشفى فوراً..!

لو عند ٤ شهور ابنك مش بيثبت رأسه كويس، مش بيلاغي (صوت الطفل، مش بيزق الأرض برجليه لما تتحط على سطح صلب (ترابيزة مثلاً).

لو عند ٦ أشهر مش بيحاول يوصل للحاجة اللي ف متناول إيده (لعبه مثلاً)، مش بيهتم باللي حواليه، مش بيستجيب للصوت، مش بيطلع صوت واضح (ااا،، اواوا )، مش بيعرف يتقلب، مش بيضحك، مش بيحرك عينه في جميع الاتجاهات..!

لو عند ٩ شهور مش "بيشد" رجله لما "تصلب" طوله، فاهمين؟

مش بيقعد حتى لو سندته بيقع!

مش بيعرف الأشخاص القريبين (بابا-ماما-تيته).

مش بيبدأ يقول أي كلمة حتى لو مقطع (دا-دا،،ماما).

مش بيعرف ينقل الحاجة من إيد لإيد (لعبه مثلاً)..!

لو طفلك وصل للعمر ده ومش بيعمل الحاجات دي اكشفي مرة واتنين وتلاتة والدكتور هيحدد إذا كان في تأخر ويطمنك?

ربنا يحفظ أطفالنا جميعاً ويبعد عنهم كل سوء آمين يا رب العالمين.

عدد المشاهدات 597

  • وعي حضاري
  • الأكثر قراءة
  • الأكثر تعليقا
Top